Mar 6 | TPA | STEP | Yesu ma a tauvotagho we dobuna Caponiam hi voterei, ma hi naeme a au meyagai au Nazareth mepa i ra'ara'atayana.

Mark 6

Mai Nazareth Yesu hi Gedu'aiyei

(Matthew 13:53-58; Luke 4:16-30)

1 Yesu ma a tauvotagho we dobuna Caponiam hi voterei, ma hi naeme a au meyagai au Nazareth mepa i ra'ara'atayana. 2 Viyagohina au maratomna yana anivi'emosi au numana i vikare po i hanahanapu, ma rava maghamaghauhi hi rautanighana ma hi amhuna. Ma hi raubayadanameehi hipa, “Mepa we dewahi i vainihi?” ma “We nuwahuyahuyana aiya i verei?” ma “Menana'arena po we dewahi anivinuwanaina e voghe'etehi?” 3 Wate hipa, “We tauna yana tauraunuma ohota, Mary natuna ma James, Joseph, Judas ma Simon tuwahi magurina. Ma novunovuna we hei ma'eyana.” Yamna aubaina po hi gedu'aiyei.

4 Ma Yesu auwarihi ipa, “Peroveta au dobu gheha hi vi'ate'atehi ma a au meyagai, a ghughuni ma ana dam yana e'egha.” 5 Yamna aubaina dewa anivinuwanaina egha ita voghe'etei, ma rava doridori'ahi vohiyavahi'ava i vodadanihi ma hi yawahana. 6 Ma egha hitai tumaghana aubaina i amhuna. Ma meyagai ghehauhiyei i nae ma i hanahanapu nae.

Yesu, a Tauvotagho* 12 i Himirihi

(Matthew 10:5-15; Luke 9:1-6)

7 Yesu, a tauvotagho 12 ruwaruwaghei'ava i himirihi, po meyagai tapuna ma tapuna auwarihi. Ma manini i verehi po aruwa apo'apoehi hina raukaiwenihi. 8 Ma babani ghaeghaena i terei auwarihi ipa, “Egha purapura aiwa ami kadau auwarina ona vowai, aita ami jighona'ava, ^{▼▼6:8gaiwara} egha yam bo autu ma egha mane autuna. 9 Aehuma ona oteni ma egha kwama viruwaina ona vaivaini.” 10 Ma i riwehi ipa, “Me au numana ona rui, yana nahidana ona ma'ae da na meyagaina ona hopu aharei. 11 Ma inapa metauna au meyagaina rava egha hina vokaokaohemi bo hina rautanighanemi, yana ona nene'aharei ma aeyapayapami vunavunana ona raihoruhorui. Po na'i yana virovorovo matakirahana.” ^{▼▼6:11Maranai mai Judea* au dobu gheha hi kadakadau po he nenememe'i au Israel, yana aehi vunavunahi he raihoruhoruhi ahi au parata, po tauhi yana hi wanaghadarameehi. Mepapo Yesu ana tauvotagho we dewana hi dewai, yana rava na au meyagaina apo hina nuwa hanapu, “We ravahi he ririwa da tai'wai rava apo'apoe'ai, egha me rava mai Judea.” Acts 13:50-51}

12 Anima hi hopu po hi rauguguyanai rava auwarihi ma hipa, “Ami dewabo'a ona voterehi ma ona wanatavirami Maimaituwa auwarina.” 13 Ma aruwa apo'apoehi maghamaghauhi hi raukaiwenihi, ma rava maghamaghauhi olive oyohinei hi vi'oyohihi ^{▼▼6:13mutui, ghohoi} ma hi viyawahanihi. ^{▼▼6:13James 5:14}

Guyauna Herod i Pamina Yesu yana John Taubabataito*

(Matthew 14:1-12; Luke 9;7-9)

14 Dobu maghamaghauhi ma rava atapuhi, yana Yesu wavana hi hanapuwei ma hi babaniyei. ^{▼▼6:14hi dedei} Ma rava ghehauhi hipa, “John Taubabataito* i hiraghe ma i yawahaname, ^{▼▼6:14vomahirime} yamna aubaina we dewahi anivinuwanaina e voghe'etehi.” 15 Ghehauhi hipa, “We'i yana Elijah.” Ghehauhi hipa, “We'i yana peroveta ghehauna me warihagha.” 16 Wate maranai guyauna Herod ^{▼▼6:16Guyauna Herod yana Herod Antipas, Galilee tautaniwageina.} we tuyeghana i nonori yana ipa, “We'i yana John Taubabataito,* a riwa po uwana hi tarautuini ma i yawahaname.” ^{▼▼6:14-162 Kings 2:1-15; Malachi 4:5-6}

17 John Taubabataito* uwana borina dededena yana we nana'arena. Muriyai po Yesu a bagibagi ita vikareni, Herodias yana Philip awana, ma Herod yana varehina Philip ma i vomahiri po i haroi. Aubaina John Taubabataito i ririwei ipa, “I viraugagayo duma, havena po varehim awana uta ravaghi.” Ma Herod tau'avana i vi'autana po hi pani ma au deri hi gudutomeni. 19 Ma Herodias yana John rau'amo ghaighaiyana dumei, aubaina i ghohei po ita vihiragheni. Ma egha emo'emosina 20 babana Herod i haramanei, po John yana rava vivireina ma i dumaru Maimaituwa au matana, aubaina po i rovowei ma i tere vaimahi'eni. Ma i ghohei po ponana ina nonori ma wate kamnana i rai'apo'apoeni. 21 Ma Herodias a gavogavo i vi'aroni, Herod a haugaghuni kaohana auwarina. Toreha i dewai yana dobu babadahi, ghaviya tanitaniwagahi ma rava ghaeghaehi mai Galilee i ghorehi po hi riyane'i. 22 Maranai Herodias natuna guguhinina i rui po i harahara, yana Herod ma a ta'omana i rauvainihi. Aubaina guyauna, guguhinina i riwei ipa, “Aiwa u ghohei? Am rauhoghara aiwa'i yana apo a verem.”

23 Ma i parivainuwaghani ma i vigwara ipa, “Aiwa u ghoheghoheiya apo a verem, inapa a'u anivitaniwaga tupona ghehauna, yana apo emo'emosi'u.” 24 Mara emosi, guguhinina i hopu po ayona i raubayadei ipa, “Aiwa a vibaghei?”

Ma ayona ipa, “John Taubabataito* unu'ununa.” 25 Po yaghiyaghina'ava i wanavirai po guyauna i raihunahunai ipa, “We marina yaghiyaghina'ava John Taubabataito,* unu'ununa ona raugaebai po ona vere'u.” 26 Guyauna yana i vinuwaboya duma, ma egha emo'emosina po ita gedu'ai, babana a ta'omana au matahi ma i vigwara. 27 Aubaina po tauvighaviya i raihunai ipa, “John unu'ununa ona neiya'i.” Ma i nae au deri po John uwana i tarautuini, 28 ma au gaeba i terei, po i neiya'i, ma guguhinina i verei po ayona i vere damanei.

29 Maranai John a tauvimuritagho tuyeghana hi nonori, yana hi nae po tupuwana hi vaini ma hi naiyei, po kokowaga* me duyuwa ^{▼▼6:29guba} auhinenina hi terei.

Yesu, Rava Maghamaghau Dumahi (5,000) i Ghamohi

(Matthew 14:13-21; Luke 9:10-17; John 6:1-14)

30 Yesu a tauvotagho vinevinehi* hi wanavirameehi auwarina po aiwa hi dewadewaiya, ma me hi hanahanapunei atapuna hi vipariverenei. 31 Ma na au marana, yana rava hi magha duma hi nene'i ma hi naenae, ma egha Yesu a tauvotagho maitehi gavogavo hita verehi po hita am. Ma i riwehi ipa, “Na ravahi ona voterehi ma ona ne'i, ma tana nae au dobu kwakwava po ta viyagohina.” 32 Po tauhi'ava au wam hi geru ma hi amkuka nae au dobu kwakwava. 33 Ma rava maghamagha hi inanahi, ma hi inana tuhaghahi, aubaina meyagai maghamaghauna ravahi, gerahei hi votaghonae po hi ai ghe'eta na au dobuna, ma muriyai Yesu a tauvotagho maitehi hi ghota. 34 Maranai Yesu wamei i hauhopu yana rava maghamaghauhi i inanahi, ani'inanahi me ghamoghamo (sheep) egha ahi tauvipa'ipa'i maiteni. Yamna aubaina i nuwadubuwehi, ma i vikare po Maimaituwa a vitaniwaga vouna* tuyeghana ana rava auwarihi atapuna i vihanahanapuhi. ^{▼▼6:34Ezekiel 34:11-15; Jeremiah 23:5-6; Numbers 27:1} 35 Maranai au i biga, yana a tauvotagho hi ne'i po hi riwei hipa, “We au dobuna egha rava hita ma'ama'ae, ma aita madegha e yoriyori. 36 Rava ma pari'aharehi po hina nae, meyagai aughereghereta ^{▼▼6:36auririvata} auwarina po ahi yam hina gimara.”

37 Ma i paribeehi ipa, “Taumi yam ona verehi po hina am.”

Ma tauhi auwarina hipa, “Tam u ghohe'ai po denarii 200 a gimarei po we patarana ghaeghaena a hewahi, ma auwari'ai egha emo'emosina!” ^{▼▼6:37Greek200 denarii Denarius emosi yana maratom emosi maihana.}

38 Po i raubayadehi ipa, “Habe ona baiha, payawa habi'agha auwarimi?”

Maranai hi tuhaghai ^{▼▼6:38nehaghai} yana hipa, “Auwari'ai yana payawa nima emosi ma iyana ruwagha.”

39 Anima Yesu a tauvotagho i riwehi ipa, “Rava atapuhi ona riwehi po au gidagida hina tughura.” 40 Aubaina hi tughura, boru ghehauhi 50 ma ghehauhi 100. ^{▼▼6:40Exodus 18:21} 41 Anima Yesu payawa 5 ma iyana ruwagha i vaini, ma au mara i watata ^{▼▼6:41tahepai} ma Maimaituwa i tarahiyauwei, ma payawa i tomutomui ^{▼▼6:41i kabakabari} iyana maiteni. Ma a tauvotagho i vereverehi ma rava auwarihi hi raughutei. 42 Ma atapuhi hi am po hi amhiyauwa duma, 43 anima a tauvotagho payawa ma iyana amtereterenana hi tu'waruhi, yana poha 12 hi vihowahi. 44 Rava, tau'am yana hi magha duma (5,000) nana'arena.

Yesu Hagahaga ^{▼▼6:45waira} Tepanei i Nae

(Matthew 14:22-33; John 6:15-21)

45 Yaghiyaghina'ava Yesu a tauvotagho i himirihi, po au wam hi geru ma hi aitayaha, hagahaga autupo ghehauna, dobu ana wava Betsaida, ma wate tauna patarahi i himirihi. 46 Maranai i pari'aharehi nuwa ahi'ahiyei, yana tauna au oya i amghaena raupari aubaina. 47 Ma na waguvaraina, yana Yesu a tauvotagho wamei, hagahaga ausiporina, ma tau'avana yana au hayahaya. 48 Ma i inanahi hi voevoe ma hi reta, togowa ma hive hi veraveraumatamatani. Ma na'i yana waguvarai, ma maratomtom augheregherena, ma hagahaga tepanei i nene'i po ipa ita verauvirehi. ^{▼▼6:48tehaharihi} 49 Ma hi inanai yana hi pamina konagha po hi otu ^{▼▼6:49garara} bo'abo'a. 50 Maranai atapuhi hi inanai yana hi rovo duma. Ma yaghiyaghina'ava, Yesu ponana i terei ma ipa, “Ona nuwamotu! We yana ta'u. Egha ona rovo!” 51 Anima au wam maitehi i geru, ma hivena i daumori. ^{▼▼6:51-52i voterei} Ma a tauvotagho hi amhuna duma, babana egha aiwa hita inana tuhaghai marana payawa i dewai po i maghamagha. Babana nuwanuwahi yana i toghara duma.

Yesu, Rava Doridori'ahi Maghamaghahi, au Gennesaret i Viyawahanihi

(Matthew 14:34-36)

53 Hagahaga hi damani po hi nae au Gennesaret, po hi ghota ma ahi wam hi yoghoni. 54 Po ahi wam hi tere aharei, ma rava mara emosi Yesu hi inana tuhaghai. 55 Ma dobuna ghaeghaenana hi naeni, ma rava doridori'ahi hi hihiva naiyehi, mepa hi nonori po Yesu i nene ^{▼▼6:55ma'ema'e} yana. 56 Yesu a aninae atapuna auwarina, meyagai ghaeghaehi ma muhomuhohi po vaovao au numahi, rava ahi rava doridori'ahi na dobuna auwarina, hi naiyehi po au habuhabuna hi terehi, ma hi vibagha hipa, “Ma vi'anina po am gara ipirina'ava hina vodadani.” Ma aiyavo doridori'ahi ma hi vodadani yana atapuhi hi yawahana, Yesu a kajijirei. ^{▼▼6:56vuhigha, manini}